| Cicero, Epistulae ad Familiares (XML Header) [genre: prose; letters] [word count] [lemma count] [Cic. Fam.]. | ||
| <<Cic. Fam. 1.4.1 | Cic. Fam. 1.4.3 (English) | >>Cic. Fam. 1.5a.1 |
1.4.2
haec tamen opinio . est populi Romani a tuis invidis atque obtrectatoribus nomen
inductum fictae religionis , non tam ut te impediret , quam ut ne quis propter exercitus cupiditatem Alexandriam vellet ire . dignitatis autem tuae nemo est quin existimet habitam esse rationem ab senatu ; nemo est enim , qui nesciat , quo minus discessio fieret , per adversarios tuos esse factum ; qui nunc populi nomine , re autem vera sceleratissimo tribunorum latrocinio si quae conabuntur agere , satis mi provisum est , ut ne quid salvis auspiciis aut legibus aut etiam sine vi agere possent .
1.4.3
ego neque de meo studio neque de non
nullorum iniuria scribendum mihi esse arbitror ; quid enim aut me ostentem , qui , si vitam pro tua dignitate profundam , nullam partem videar meritorum tuorum adsecutus , aut de aliorum iniuriis querar , quod sine summo dolore facere non possum ? ego tibi a vi , hac praesertim imbecillitate magistratuum , praestare nihil possum ; vi excepta possum confirmare te et senatus et populi Romani summo studio amplitudinem tuam retenturum .
| Cicero, Epistulae ad Familiares (XML Header) [genre: prose; letters] [word count] [lemma count] [Cic. Fam.]. | ||
| <<Cic. Fam. 1.4.1 | Cic. Fam. 1.4.3 (English) | >>Cic. Fam. 1.5a.1 |
